ACLARA AS TÚAS DÚBIDAS E VENTE VOAR

Preguntas frecuentes

Atopa resposta ás túas dúbidas sobre parapente

¿Con quen debo contactar se quero facer un curso?

Debes contactar cun club da túa zona para que te dirixan a unha escola próxima. É fundamental o respaldo dun grupo para aprender con seguridade e empregar a experiencia d@s instrutores/as para progresar con método e orde. Se queres facelo no noso Club, tes os datos na sección CONTACTAR

¿Quen fai o mantemento dos despegues de parapente?

Dase o caso dalgúns despegues que se manteñen sós. En Marte, principalmente. Neste planeta, encargámonos os Clubs de manter coidadas as nosas zonas. Os membros do Club Parapente Ferrol sempre están dispostos a botar unha man no acondicionamento dos despegues, o que redunda en maior seguridade e coidado do material. Cantos máis somos, máis doado é!

¿Cantos anos hai que ter para voar en parapente?

Contando con autorización familiar (pai, nai ou titor/a legal) pódese empezar a practicar a moi curta idade, pero o certo é que o parapente xunta moitas cualidades que adoitan gustar a deportistas maiores de 18 anos. Require paciencia, estudio teórico e certa madurez persoal que permita tomar decisións por riba do teu ego.

¿Como podo saber se me gusta voar en parapente?

Vente a un despegue un día de voo. Verás como son os protocolos da pilotaxe. Se che gusta, proba a facer un bipraza e sairás de dúbidas… O certo é que moitas persoas levamos no noso interior dende pequen@s a necesidade de voar, e o voo libre en parapente é a expresión máis pura, ata o de agora, na que as persoas podemos relacionarnos co aire. Ascender voando suavemente polas ladeiras, xirar como un ave nas ascendencias térmicas, planear por riba de outeiros e montes…  Ábrenseche moito os ollos? Pois gustarache voar!!!

¿Que é un voo bipraza e onde podo solicitalo?

Un voo bipraza é un voo en parapente de dúas prazas: un/unha pilot@ expert@ guía o parapente e ti, que irás sentad@ diante, só terás que gozar das vistas e familiarizarte co novo medio: o aire. Podes facer un bripraza facéndote SEGUIDOR/A do noso Club, ou agardar unha promoción do deporte na que haxa voos gratuitos. Cando as facemos, informamos na nosa web e redes sociais.

¿Canto dura un curso de parapente?

Esquece os conceptos de curso habituais. O curso adoita durar unhas 20 sesións, pero a aprendizaxe do parapente implica unhas condicións meteorolóxicas concretas e delas dependerá a duración cronolóxica do curso. O importante é que domines os contidos do mesmo e saibas manexarte de xeito autónomo. Se o tempo é benévolo, podes facer esas 20 sesións nun par de meses. Senón, pode estenderse moito máis.

¿É caro voar en parapente?

Se o comparas con pasear, si que é caro. Se o comparas con voar en avión, é baratísimo :-P. Un equipo completo novo e de ultimísima xeración adoita custar sobre 3.200 € e de segunda man uns 1.200 €. Ése é o prezo dunha aeronave que podes gardar nun macuto!!!

¿En canto tempo podo aprender a voar?

Algunhas persoas do Club levamos voando 15 anos e seguimos aprendendo. Aprender a voar non é un fin, senón un camiño. O máis fermoso e excitante camiño que poidas imaxinar. De tódolos xeitos, os alumnos e as alumnas da ESCOLA DEPORTIVA CPFERROL acadan certa autonomía a partir dunhas 20 ou 30 horas de voo aproximadamente.

¿Hai exames de parapente?

Si que hai exames: os títulos federativos son os únicos oficiais no territorio español. Axúdannos a organizar a nosa formación dun xeito secuenciado e completo. Trala túa iniciación como alumno ou alumna e despois de acumular 50 voos, podes examinarte na FAG para obter a condición de pilot@ en prácticas, o que supón unha maior autonomía. Son exames sinxelos, con contidos aprendidos no curso.

¿Onde se pode voar en parapente?

Existen zonas de voo recoñecidas onde se dan as condicións axeitadas para o voo libre. Hai normativas que regulan o voo e respectalas devén nun maior recoñecemento e respecto polo noso deporte. Cando comezas, voas en zonas con alto nivel de seguridade. Segundo vaias progresando, adquires o nivel de coñecementos e habilidades para distinguir as zonas “voables” e gozar delas.

 

¿Vale calquera día para voar en parapente?

Absolutamente non. As condicións para voar en parapente requiren uns valores de intensidade e estabilidade concretos e difícilmente previsibles. Por eso é importante gozar da amizade e do bo ambiente no monte, xa que pasamos moito tempo falando e agardando a que o vento sexa idóneo para poder voar.

¿Federarse ou non federarse?

Federarse ou non é unha libre elección de cada quen. Como indican os nosos estatutos, para ser soci@ do Club Parapente Ferrol, podes estar federado ou non. Se queres federarte e que nós tramitemos a túa solicitude, farémola pola Federación Aeronáutica Galega (FAG), que depende da Secretaría Xeral para o Deporte da Xunta de Galicia. A través dela, tramitamos as nosas licencias e seguros federativos e organizamos as competicións. Se prefires voar sen federarte, hai seguros privados para desenvolver a actividade de voo. O noso consello é que tomes a decisión que ti prefiras, pero que teñas sempre un seguro que garanta a cobertura das túas actividades aéreas e che permita gozar deste fabuloso deporte.

¿Non atopas resposta?

Escríbenos un correo electrónico

Contacta connosco para preguntarnos as dúbidas que che surxan sobre este apaixoante deporte. Podes chamarnos por teléfono ou whatsapearnos ao número 618581710.

Ponnos un mail
Escríbenos

En breve che contestaremos.

Copyright
× ¿Como podemos axudarche?